باسم الله البادي على كل بادي=اللي رفع سبع ولا ركز عماد
المعتلي في العرش ماله مسادي=ماله شبيه ولا مثيل ولا انداد
ابدع بصنع الكون رب العبادي=ويدبر الأفلاك من حيث ماراد
ارخى علينا نعمته بازديادي=ساق الحيا واسقى الفيافي والاوتاد
حتى جرى الحاير مشى كل وادي=واستبشرت به النخل والرجع زاد
واخضرت اراضي الحظر والبوادي=والبادية عند اهلها صارت بلاد
يابو سعد مني سلام وكادي=من خاطري سقته وهو سمح منقاد
ومحمل بالعطر ورد وكادي=والمسك والريحان والعود زواد
للصاحب اللي حولنا لو ننادي=قريب لكنه بعيد وشداد
يوم الزهر فتح وخف البرادي=والبر زان وصار للبر ميعاد
ذكرت حبك للرمل والشدادي=واشعال نار لو على قش واعواد
ياما حلى ضوٍ من الرمث غادي=دخانهاله ريحه كما العود او كاد
وبراد شاهي قد غطاه السوادي=مركا عاى المجمار واسود وش عاد
في مهمه خالي من الناس هادي=معك وجيه الخير مافيه حساد
سمحه سوالفهم ولا به قيادي=لا ناقل الذمه ولا فيه نقاد
مزح وسواليف قدام وجدادي=فيها طراة لو تكرر وتنعاد
ويا زينها لوك على جال وادي=تسمع هديرالسيل والخير يزداد
من مزنة هلت بوقت الهجادي =والصبح علت والعصر نور عاد
هذي مناة النفس هذا المرادي=وان كنت مخطي صحح العلم يا ستاد
منكم نحب المعرفه يا سنادي=يابو سعد عطنا من العرف ما فاد
والعذر منكم كان به نقص بادي=ما يكمل إلا وجه خلاق العباد
تمت وصلى الله على خير هادي=من بلغ التوحيد ما انقص ولا زاد

في مهمه خالي من النـاس هـادي = معك وجيه الخيـر مافيـه حسـاد
سمحه سوالفهـم ولا بـه قيـادي = لا ناقـل الذمـه ولا فيـه نـقـاد

صح لساااااااااااانك ابوانس على هذه الابيات الجميله والرائعه


لك تحياااااااااااااتي .............



الجاااااااااااااارح ............