كل موقع مثل دكانٍ وحنّا به زباين= ان كسبنا صاحبه بالخلق نشري ما نريده
وان عبس بوجيهنا نمشي ولاحتى نعاين= غيره ابرك منه لو في البيع اسعاره زهيده
بعضهم بالطبع ماكر وفيه من طبع الصهاين= يخدعك لو هو تبسّم واظهر اخلاقٍ حميده
النجاسه في ضميره للأمانه دوم خاين= ماشيٍ بالغش مخفي وواصلٍ للي يريده
وبعضهم طيّب ولكن واثق بخبث البطاين= انخدع فيهم ولو هم من قريبين البديده
ناصبينٍ للشراك وحافرينٍ للكماين = وماهرينٍ باصطياد اللي لفاهم من طريده
نفّروا هذا وهذا وقرّبوا خبث النماين= من خميمٍ ما يفكر غير بافكار بليده
متعبين اللي شريفٍ شايفٍ كل الغباين= ينفد بجلده ويمشي قبلما ذيخٍ يصيده
ثم يبدا السوس ينخر من تحت ماهوب باين= لين ما ينهار صرحٍ فوق راس اللي يشيده
انتهى الدكان خاسر وافلست كل الخزاين= والملامه والشماته من نصيبك ياعميده
فالرجل يبغى رجالٍ بالدلالة والقراين = مجلسه محسوب ضده او معه يعلي رصيده
وبعضنا تلقى بقربه ورد من كل الجناين= يحترم نفسه وغيره في مواجيبه وليده
والبعض منا حصاني عاثياتٍ بالمداين= بالمكر والخبث تمشي جاهزات بالمكيده
تخدع الغزلان بالقيفان تمسك بالملاين= فالشعر شهره وتمره تنلحس قبل القصيده
رحمةٍ كثر المواقع فابتعد عن كل شاين= واختر اللي في رجاله من يشوف إنّك عضيده
معرفة رجّال مكسب في زمن كثر التباين= اختلط دره بنفوه حتى في صدق العقيده

قلت يالطير المهاجر قول واضح قول باين=المواقع كالبضايع كلٍ يدور فقيده
والحسايف يوم صارت للشلل فيها تغابن=كانك انثى أو صديقي ابشر بسهمك نزيده
مايهم ان كان عندك في كتاباتك قراين=المهم اسمك ورسمك والرسايل في بريده