بديت بدمعةٍ هلت على خدي من الأحزان = أداريها ولكن ما قدرت الهم طاويني
يمر الوقت بحسابه وراقب فرحة الخلاّن = أنا اللي عايشه همّي عيون الناس ترثيني
أفكّر في ليالي قد مضت واشكي من الحرمان = سبايبها الطّمع في راتبي والخوف باديني
نصايح من كرام الخلق لعلّه يرحم الذبلان = يزيد الجرح بعناده في كل مرّه يبكيني
ياليت اللي حصل واللي سبايبها القهر ما كان = حسايف فرحتي فيها تسرّ الغير وتبليني
تقدم لي خيار الناس بلا عيبٍ ولا نقصان = ولكنّ الشروط اللي فرضها الوالي تبقيني
حرمني الوالد وما فّكر بنفسي وأنا الولهان= أعيش أحلى حياتي مع وليف الروح يغليني
حرمني من حياة العز ومن أبسط حقوق إنسان = حرمني من حنان الزوج ومن طفلٍ يسلّيني
أخاف أن العمر يمضي أخاف الصّد والهجران = أخاف أني أموت وما ضنايا شافته عيني
شكيت الحال للي أنزل التوراة والقرآن = يزيل الهمِّ عن قلبي ويسْعدْ باقي اسنيني

شعر
أبو الفيصل